ONTube بعد عامها الأول

مشاهدينا … نروح لأخر جزء من أون تيوب .. و هو جزء خاص جدا .. لأنه عن برنامجنا أون تيوب اللي إنهاردة بيتم عامه الأول.
أون تيوب إتولد مع الطفرة اللي حصلت في عالم الإعلام الإجتماعي .. و الزيادة الكبيرة اللي حصلت لعدد مستخدميه .. من الوطن العربي تحديدا .. الى جانب الإهتمام الكبير اللي بقة بيلقاه العالم ده من كل الناس. فكان فكرة أون تيوب إنه يكون نافذة لكل الأعمال اللي بيصنعها المواطن و بينشرها على المواقع الإجتماعية .. اللي هي في معظم الأحيان .. إن لم يكن كلها .. بتنقل الأحداث اللي بتحصل على أرض الواقع .. بالصورة والصوت .. و أهتمامنا بالأعمال دي .. كان من أجل توصيلها لأكبر عدد من المشاهدين .. خصوصا لكل اللي معندوش الفرصة او المقدره إنه يشوفها .. لأنها أعمال بتنقل صورة واقعية .. و 99% بتكون خالية من أي تلاعب أو فبركة.
و لو حضراتكم متابعين البرنامج من يومه الأول .. زي إنهاردة من سنة .. هتلاقوا إننا مهتمين بالشأن المصري .. والشأن العربي و العالمي. فأي دولة بيحرص أبنائها على نقل الواقع .. بيلاقوا أعمالهم موجودة في برنامجنا .. من خلال إنهم بيبعتولنا الأعمال دي .. أو فريق العمل بيحاول يوصلها.
و إهتمامنا مش بس بالحراك اللي بتشهدوا دول العالم المختلفة .. إنما كمان بالفنانين و المواهب اللي بيطلق عليها .. أندر جراوند .. او الأعمال الموجودة على المواقع الإجتماعية فقط .. لتعريف الجمهور بالأنواع والألوان والأنماط الفنية المختلفة .. ولعلنا نكون عامل مساعد على إكتشاف مواهب جديدة .
و في أون تيوب .. بنكون شديدي الحرص على الإلتزام بالحيادية .. دون تحيز الي جهة أو فئة أو وجهة نظر بعينها. حتى الفيديوهات اللي بنعرضها .. لا تعني إننا معها أو ضدها .. و إنما بنعرض ما يصنعه المواطن .. أي كانت خلفيته أو معتقداته أو إنتمائاته .. لإيماننا الشديد بأن كل إنسان له حق إبداء رأيه.
و الحقيقة إن كل حلقات و ضيوف أون تيوب كانوا إضافة جميلة لبرنامجنا .. و كنا دايما سعداء بوجودهم و مشاركتهم معانا. و تحية خاصة أحب أوجهها لكل شخص شارك معانا في أي من حلقات أون تيوب .. و لكل اللي بعتلنا أرائه أو فيدهاتوا.

هذا المحتوى من